საგარეო საქმეთა სამინისტროს ნატოსა და ევროკავშირის შესახებ საინფორმაციო ცენტრის ორგანიზებით, ევროატლანტიკური ინტეგრაციის საკითხებზე ონლაინ სემინარები ჩატარდა. ლექციები მიზნად ისახავდა ადგილობრივი თვითმმართველობების წარმომადგენლებისთვის საქართველო-ნატოს თანამშრომლობის შესახებ ცოდნის გაღრმავებას.

სემინარების ციკლი საქართველოში აშშ-ის საელჩოს თავდაცვის საფრთხეების შემცირების სააგენტოს ხელმძღვანელის მოადგილის მაიორ მარგარეტ შილდსის ლექციით დასრულდა.

მაიორმა შილდსმა ვრცლად ისაუბრა ნატოს შექმნის გარემოებებზე, ალიანსის მიზნებსა და ამოცანებზე, კოლექტიური თავდაცვის პრინციპსა და ნატო-ს როლზე გლობალური უსაფრთხოების უზრუნველყოფის საქმეში. ხაზგასმით აღნიშნა ნატოსთვის საქართველოსთან, როგორც სანდო პარტნიორთან ურთიერთობის მნიშვნელობა.

კურსის ფარგლებში, 300-ზე მეტი თვითმმართველობის წარმომადგენელისთვის საგარეო საქმეთა სამინისტროს ნატო-ში ინტეგრაციის დეპარტამენტის დირექტორმა თორნიკე ფარულავამ საქართველოს ევროატლანტიკური ინტეგრაციის საკითხებზე 5 ლექცია ჩაატარა. ონლაინ შეხვედრებზე მომხსენებელმა ვრცლად ისაუბრა ჩრდილოატლანტიკური ალიანსის მიზნებსა და ამოცანებზე. ყურადღება გამახვილდა საქართველო-ნატოს თანამშრომლობის მექანიზმებზე, ურთიერთობის კიდევ უფრო გაღრმავების პერსპექტივებსა და ამ მიმართულებით არსებულ გამოწვევებზე.

სემინარების ციკლი აშშ-ს სახელმწიფო დეპარტამენტის მიერ დაფინანსებული პროექტის „დასავლური ინტეგრაციის შესახებ ინფორმირებულობისა და ჩართულობის გაზრდა საქართველოს რეგიონებში“ ფარგლებში ჩატარდა. პროექტს საგარეო საქმეთა სამინისტროს ნატოსა და ევროკავშრის შესახებ საინფორმაციო ცენტრის საქართველოში აშშ-ს საელჩოსთან ერთად ახორციელებს და მისი მიზანია ქვეყნის ევროპული და ევრო-ატლანტიკური ინტეგრაციის პროცესების შესახებ რეგიონებში ეფექტიანი კომუნიკაცია.