„დასავლური ინტეგრაციის შესახებ ინფორმირებულობისა და
ჩართულობის გაზრდა საქართველოს რეგიონებში“
პროექტის დასახელება: „დასავლური ინტეგრაციის შესახებ ინფორმირებულობისა და ჩართულობის გაზრდა საქართველოს რეგიონებში“
ბიუჯეტი: 749 673, 56 აშშ დოლარი
ხანგრძლივობა: 51 თვე (დაწყების თარიღი 28 სექტემბერი, 2018 წ – დასრულების თარიღი 30 დეკემბერი 2022)
მოკლე აღწერა
„დასავლური ინტეგრაციის შესახებ ინფორმირებულობისა და ჩართულობის გაზრდა საქართველოს რეგიონებში“ არის პირველი მასშტაბური პროექტი, რომელიც საქართველოს მთავრობამ ანტი-დასავლური პროპაგანდისგან მომდინარე საფრთხეების წინააღმდეგ საქართველოს მოსახლეობის მედეგობის გაძლიერებისა და ქვეყნის ევროპული და ევროატლანტიკური ინტეგრაციის პროცესების შესახებ ეფექტიანი კომუნიკაციის მიზნით მიიღო.
2018 წელს, ამერიკის შეერთებული შტატების სახელმწიფო დეპარტამენტმა საქართველოს სამთავრობო უწყებისთვის ქვეყნის სტრატეგიული კომუნიკაციების გასაძლიერებლად 499,675 აშშ დოლარის დახმარება გამოყო. პროექტი განახორციელა საგარეო საქმეთა სამინისტროს სსიპ-მა საინფორმაციო ცენტრი ნატოსა და ევროკავშირის შესახებ, საქართველოში აშშ-ს საელჩოსთან ერთად, აშშ-ს სახელმწიფო დეპარტამენტის ფინანსური მხარდაჭერით.
პროექტი მიზნად ისახავდა საქართველოს ევროპული და ევროატლანტიკური ინტეგრაციის მიმართ, საქართველოს მოსახლეობის გაცნობიერებული მხარდაჭერის განმტკიცებასა და გაზრდას და ანტი-დასავლური პროპაგანდის შედეგად გავრცელებული მითებისა და მცდარი შეხედულებების მიმართ საქართველოს მოქალაქეების მედეგობის განმტკიცებას.
პროექტის პირველი ფაზის მიღწეულმა შედეგებმა მნიშვნელოვნად შეუწყო ხელი საქართველოს დასავლური ინტეგრაციის პროცესის შესახებ ინფორმაციის მიწოდებას ფართო საზოგადოებისათვის საქართველოს ათივე რეგიონში. აქტიური ინტერვენციისა და საინფორმაციო კამპანიის შედეგად, რეგიონებში მცხოვრები მოსახლეობა რეგულარულად იღებდა მეტ ინფორმაციას საქართველოს ევროპული და ევროატლანტიკურ ინტეგრაციის შესახებ.
2020 წლის ივლისში აშშ-ის სახელმწიფო დეპარტამენტმა მიიღო გადაწყვეტილება პროექტის გაგრძელებასთან დაკავშირებით და მისი განხორციელებისთვის დამატებით გამოიყო 250 000 აშშ დოლარი. პროექტის მეორე ფაზა მიზნად ისახავდა მიღწეული შედეგების კონსოლიდაციას და მოქალაქეების არამარტო ინფორმირებას არამედ მათ აქტიურ ჩართვას დასავლური ინტეგრაციის პროცესებში.
